Ych wandere, ych wandere
vom ainte Hoorn zem andere
mit Hiking bisch hyt voll drby
e Gipfelselfie das muess sy

I fyyl mi wien e Alpstaibogg.
Bruuch sicher au kai Wanderstogg.
Die dyyrschte Maarge haan i aa,
au wenn i gaar kai Fitness haa.
Bäärgfierer? – Bruuch i sicher nit,
nimm numme s hailig Handy mit.

Ych wandere, ych wandere
vom ainte Bass zem andere
dr wyss-blau-wyssi Wanderwääg.
Weisch yolo, Alte – ych bi swag!

Mach alles, wie uff TikTok gsee,
stampf mit de FlipFlop dure Schnee.
Post bi Insta crazy Sache,
wo me baardu sotti mache.
S goot ooni Klättersail in d Wand.
Uff Facebook gseesch mi Sunnebrand.

Ych wandere, ych wandere
vom ainte Stai zem andere
stotzig wirds, doch i styyg heecher
kumm em Himmel langsam neecher

Ych nimm mi Phone und steggs an Stick,
wills so die beschte Bilder git.
Doch uff aimol goots nimm wyter.
Mischt, my Laag isch schandbaar schytter.
Kum nit voraa und zrugg kai Schritt.
Ha Schiss, wills doo kai Wääg mee git.

Ych wandere, ych wandere
vom ainte Spalt zem andere
rutschig wirds und s Wätter ruucher
d Bei sin mied, mi Stimmig duucher

Und will i nimmi aabe kaa,
lytt ych halt schnäll dr Rettig aa:
«Miend mi hoole! Jo jetzt – Sorry»
Wow, das git e cringy Story!
Wenn si kemme, duen i streame,
alles live uff YouTube beame.

Ych wandere, ych wandere
vom ainte Kick zem andere
extrem riskant, will Klicks muesch haa
baraad stoot au dr Sänsemaa

De Influencer iire Hype:
d Bäärg-Rettig koo loo und denn swipe.
Moraal zu dääre Gschicht gits nit.
Mir findes aifach nit so lit,
ass Mensche mien iir Lääbe setze,
fyr die Lyt, wo sich iberschetze.


Das Sujet kasch au adaptiere
uff die, wo wänn die Wält regiere.
Fyr Greessewaan & «wyter koo»,
mien anderi iir Lääbe loo.