D Susanne drääit sich hii und häär,
ihre fallt hüt s Schloofe schwäär.
Dr Kurt liggt schnarchend näbedraa,
es schyynt so, ass är schloofe kaa.
Doch d Susanne drääit sich wyter wund,
das merggt jetz schliesslig au dr Hund.
Är bällt im Körbli ganz verschreggt,
was widerum dr Kurt uffweggt.
«Was machsch denn au?» Frogt är sy Frau.
«Ych ka nit schloofe! – Katastrophe!»
«Mach halt dyni Auge zue!»
Dr Kurt verliert so langsam d Rueh…
«Ych machs nit äxtra, s isch halt soo!
Du waisch scho was isch halt jetzt doo!»

D Brigitte rieft mit strammem Doon:
«Ych bi barat!» zu Maa und Sohn.
Si goht drum hüt mit ihre Männer,
uff e Wandrig, zmitz im Jänner.

Dusse isch es bitter kalt.
Uff halbem Wääg schreit d Brigitte: «Halt!»
Entledigt sich vo Schaal und Jagge.
«Sag mol Schatz, hesch du e Magge?»
«E sone Schäiss – ich ha sau häiss!»

D Brigitte stoht im T-Shirt doo.
«Het di dr Verstand verloo? Im Winter Hitz?
Du machsch doch Witz?»
«Ich machs nit äxtra, s isch halt soo!
Du waisch scho was isch halt jetzt doo!»

«Worum scho wider losch di Däller,
aifach stoh und s Liecht im Käller,
brennt scho wider, s macht mi Muff
und in dr Garage hesch e Buff!
«Wenn d lüftisch…» hörsch d Ruth wyter krääie,

«…söllsch d Haizig gfelligscht aabedrääie!
Und überhaupt, s isch an dr Zyt,
bis s warm wird, isch es nümmi wyt,
scho lang isch duss dr Pool im Garte,
uff dyni Putzaggtion am Warte!!!»
Dr Ruedi längt sich gstresst an Kopf,
isch usser sich, dä armi Dropf.
«Sag, hesch Fieber? Hesch scho gmässe?
Oder aimol mehr nüt gässe?
«Ich machs nit äxtra, s isch halt soo!
Du waisch scho was isch halt jetzt doo!»

STOP!!!!!!

Esoo kas doch nit wyter goh!
Hänn dir d Botschaft nit vernoh?
Drotz LGBT plus und Co,
isch es laider no esoo,
dass d MENOPAUSE – s isch e Schand,
TABU isch doo by uns im Land!!!

Drum fordere mir alli Fraue,
mit uns uff dr Putz go haue!!!
Göhnd mit uns go MENOnschtriere,
zum d Wäggseljohr MENOfeschtiere!

Unser MENOskript schrybt vor,
mir proteschtiere lutt im Chor!
Schreie: Ene MENO Muh –
D WÄGGSELJOHR SINN KAI TABU!!!

Immer mehr schliesse sich aa.
S entstoht e MENO-man-ia!
Jung und Alt sinn uff dr Strooss,
d MENOisierig lauft famos!

Infuulänzer präsentiere,
wie me duet MENOposiere!
Halte online, völlig woke,
zum Thema ihre MENOlog.

Dr neuschti Trend – de zaigsch, was hesch!
Dur das wirggsch früsch und total fesch.
Statt tättowiert – wirsch schlicht markiert
und sofort MENO-lo-gi-siert!

Die MENO-Linie zaigt grad aa:
«Wie bin ych plus/MENOs dra?»
Das fiehrt drzue, dass alli gsehn:
«Eso stohts um my Öschtrogen!»

Symbolisch für dä Grosserfolg,
stoht neu fürs Basler MENO-Volgg,
uff em Barfi – s isch sowyt:
E Wäggseljohre-MENOlith!!!

Und als Düpfli uff em i,
s wird e wyters Highlight syy:
Mir lade euch – bisch au drbyy?
Zum Wäggseljohre-Kongräss yy!!!

Wo dä isch? Nid z Basel-Stadt…
…är findet uff MENOrca statt!