Lueget, vo Bäärge und Daal,
Brennt scho dr Sunnestrahl,
Lueget, uf Aue und Matte,
Heisser und heisser, kei Schatte;
S Yys uf de Bäärge vergoot,
Oh, wie sin d Gletscher so doot.
_{Oh, wie sin d Gletscher so doot}

Lueget do aabe an See!
S fäält au scho s Wasser fir s Veh;
Looset, wie d Wälder, die scheene,
Unter dr Summerhitz steene.
Dr Himmel vom Waldbrand ganz root,
S Klima isch nimmi im Loot.
_{S Klima isch nimmi im Loot}

Lueget, vom Bäärg bis in d Stadt,
Do isch es au nimmi glatt;
Dr Summer isch unerträäglig,
Vierzig Graad, und das dääglig!
Gräägnet hets au scho lang nimm,
Kai Wasser mee, das isch schlimm.
_{Kai Wasser mee, das isch schlimm}

Lueget, vom Bäärg bis an s Meer,
Deert lyyde si, sogaar sehr,
S Wasser stygt heecher und heecher,
Stygt, kunnt em Hals immer neecher!
Mensche mien Insle verloo,
Wo solle si aane goo?
_{Wo solle si aane goo?}

Looset, es wird jetz zer Gwaal,
Kai Gletscher me, wie fadaal!
Bim Klima muess me bressiere,
Saage au die, wo regiere.
Ghandled wird drotzdäm fascht nyt,
Oh, wie lang hänn mir no Zyt?
_{Oh, wie lang hänn mir no Zyt?}

Still, uf dr Äärde wirds Nacht,
Heergott, was het d Menschhait gmacht?
Seend Ir das Stäärnli deert schyyne,
Ääs isch au nur no am gryyne.
Droggehait, Fluete und Noot,
Fir Mensch und Dier seht ääs root.
_{Fir Mensch und Dier seht ääs root}

S Stäärnli sait: «S goot mr nimm guet!
Was ich seh, lipft mr dr Huet;
D Äärde, die gheert oich doch alle,
Si loot sich das glyy nimm gfalle.
Es liggt in öierer Macht,
Sunscht Menschli, oh Menschli: Guet Nacht!»
_{Menschli, oh Menschli: Guet Nacht!}