Die Wält schmeggt langsam schuurig bitter,
s git ständig Lärm wie zmitts im Gwitter.
Für d’Ursach muesch nit dieff go wiehle,
nur aifach mol dy Kopf abkiehle.

Wurdsch besser lang uffs Gnöpfli drugge,
statt wider aim in d’Subbe spugge;
bim «Poste» machsch das nämmlig z’oft
und maischtens hart, nur sälte soft.

Wenn das scho alles wär, wär’s schöön,
doch seehsch globaal als meeh so Glöön,
wo d’Gränze nümme respeggtiere
vom guete Gschmagg bim Informiere.

So Byspiil git’s wie Sand am Meer,
drum dängg y hüffig: Läng mr’s Gweehr!
Wenn z’Washington ain «Twittern» druggt,
wird gly die ganzi Wält verruggt.

Z’Korea spilt e Biebli mit,
zum zaige, dass es ihns no git.
Sy Volgg stooht ainig hindedraa,
will’s glaubt, das Biebli syyg e Maa.

Ganz ähnlig gseehts dr Russ im Oschte:
Dört glänzt e stargge Maa als Pfoschte,
wo voll nüt bringt und drotzdäm blybbt,
bis ihn sy aigen Änd verdrybbt.

Im Oriänt isch alles glaar,
dört gooht’s im Sultan wunderbaar.
Was rächt und woor isch, sait s Regime,
und alli gööhn däm uff e Lyym.

D’Jagd nach Liecht in dunggle Egge
duet d’Lüütt hüt meeh denn je verschregge;
grad in de Käller vo de Ryyche
findsch ab und zue e früschi Lyyche.

Au z’Basel duet uns kain verschoone
vo News, wo unseri Gier beloohne
nach schyynbar yflussryychem Gschwätz –
und syyg dr Inhalt no so lätz.

So Fäcts kasch hüt au du schnäll dichte,
uff’s Recherchiere darfsch verzichte.
So schryb ych digital an jeede:
«S Tattoo zieht näggscht Joor wägg uff Schwede».

Em FCB droht e Fusioon:
Uss Bayern kunnt d’Akquisition
uffgrund vo Namensrächt und so...
Die syge halt scho lenger do...

«Dr Wessels Hampe...» kasch bald lääse
syg friehner gsi e wyyblig Wääse.
Im Geegezug zieht uns in Bann
die Vorgschicht vo dr Ackermann...

Für d BVB-Million ans Elsass
schiggt ys Paris e Hampfle Bellas,
vom Laufstääg an dr Seine diräggt,
damit au Basel d’Schöönhait bräggt.

Dr Baschi Dürr het vyyl nit checkt,
und meeh no isch em abvereggt.
D’Moraal isch schlächt und d’Stimmig schytter:
Jetzt hälfe nur no d’Karmeliter.

Em Marco Streller, Baizekönig,
git aine d’Hand – s gooht um Versööhnig.
Dr Chrigel Gross het guet gleehrt schlichte
und möcht dr Pipi neu verpflichte.

Doch dä wott nit in d’Wieschti fliege,
suecht anderwyttig sich z’vergniege,
bsuecht nur no d’Fasnacht in Lozärn,
die haig er schyyns ganz bsunders gärn.

E Grücht verbraite – digital
isch eehrlig gsait die lätzi Wahl;
von Angesicht zu Angesicht
hättsch vyyl meeh Freud an dyyner Gschicht.

Findsch s beschte Gspäänli für dä Spass
im Wöschwyyb uss dr Noochbersgass,
mit däre Gumsle glabbt’s no immer
wie friehner als im Glassezimmer.

Es bruucht uff jeede Fall do kaini
e blonde Twitter-Peitsche-Heini:
Im Gnusch vo Hoose, Rögg und Sogge
isch d Wösch zwar nass, doch d’Sprüch sinn drogge.

Bim Rätschen über Lüütt und Sache
kasch erscht no maischtens härzlig lache –
und isch am Gschichtli gar nüüt draa,
verzellsch es halt im Fäährimaa.