REVOLTA! deent e Schrey dur d Nacht,
Schyybe klirre, s git e Schlacht.
Rauch verdeggt aim d Sicht uf s Gschee,
Dr Nochberschaft wird s windewee.
Me rieft nach Hilf und luegt uf d Uhr –
Vo dr Polizei kai Spuur.
Dr Rauch verfliegt, dr Mob ziet wytter,
D Spuure um dr Platz sinn schytter.
Am näggschte Daag, me suecht dr Schuldig.
D Regierig git sich seer geduldig,
Erklärt s syg alles rächtskonform,
Dr laui Schuggeryysatz d Norm,
D Stadt nit fir nyt vo linggs regiert:
D Rebelle wurde toleriert!

Wie immer bi so Zwischefäll,
Seet me d Grind für s Iibel schnäll,
Me findet Zaiche und Tendänze,
Yyfliss vo änet dr Gränze:
London zaigt d Quartierzersteerig,
Z Ziiri randaliert me gheerig.
Z New York griegt me d Gwalt nit glai,
Nur haisst s dert ääne Occupy.

Mänggmol sin s die autonome
Und linggsradikale Gnome:
Wie in dr Freye Strooss im Mai,
Schleen si alles kurz und glai.
Oder? wär isch s jetzt genau?
Die in dr Villa Rosenau?
Me maint au s syg dä Trupp vo Ziiri,
Wo mit Gaschträcht d Wänd verschmiiri.
Vellicht sin s d Fans vom FCB,
Wo haftbar sin für s nächtlig Gschee?
Oder kemme si vo rächts?
Vo Glatzkepf heersch jo au nur schlächts.
Wär sin denn die, wo s WEF bekämpfe?
Mit Rauchpetarde d Strooss yydämpfe?
Wenn me froggt, verstoot me glyy:
Verantwortlig will kaine syy.
Wär isch s denn gsi, wenn die, wo s gsi sin,
Gar nit schuld sin an däm Unsinn?
Linggs oder rächts, was wänn denn die
Mit Fyyr und Flamme duurezieh?

S isch wie scho in de Achzger Joore.
D Jugend fyylt sich seer verloore
In dr Wält, wo jede bschysst,
Dr aint Sauhund dr ander rysst.
Dr Woolstand isch e Menscheschinder.
Verwaarloost gheit er sini Kinder
Ooni Richtig, Zyyl und Raschter,
Im freye Fall uf s Stroossepflaschter.

Drum isch dr Ruef syt Joore glyych:
«Mir sin gege Arm und Ryych!!
Wänn Freyryym für Autonomie,
Rächtsfreyi Zone die mien syy.
Vyyl Platz – das wäri ebbe guet –
Fir jugendlige Iibermuet!
Mir wänn uns spiire, aber richtig,
Sälbschtbestimmig isch uns wichtig!»
Wenn d gnauer froggsch, denn meinsch de spinnsch:
Klar fassbar sin si nit, die Winsch.

Autonomie isch scheen und rächt.
Nur funggtioniert si zimmlig schlächt:
Ganz ooni Ainhait kunnsch nit wytt,
Will kai Konsäns bedüttet Strytt.
Drum sin sich die, wo ganz verwäge
Als Hobby Extremismus pfläge,
Au sälten ainig, wenn s drum goot,
Wie me zuen enander stoot.
Wär d Verantwortig mecht draage,
Was genau me wie mecht saage,
As s dr Hinterletschti schnallt.
Am Schluss blybt nur Kravall und Gwalt.

Mir sage drum, so isch s nit richtig!
Was soll die Gwalt, was soll d Vernichtig?
Ob Autonomi, Sozialischte,
Rächtsradikali, Antichrischte,
Anarchischte, Bürokrate,
Serbe, Türke und Kroate,
Fuessballfans, WEF Demonstrante,
Jungi Kids und alti Dante,
Ob Cüpli oder Büggsebier,
Ob Velo, Trämmli, 4x4,
Ob Vegi oder Fisch und Flaisch,
Ob bsoffe, as de nyt me waisch,
Ob Glatze oder Raschtazopf:
Alli geen in glyyche Dopf!

Em Rattefänger wämmer pfyffe,
Dass er kunnt ko duuregryffe.
Mit sym Fleetli d Stadt befreyt,
D Kapuzzejäggli d Brugg ab gheyt.
Denn hän mir wider d Rue zum heere,
Was die Junge so tuet steere.