Syt jeehäär sin dr Krieg und s Hasse
S SpeziaIgebiet vo dr Menscherasse.
MachtlIuscht, Nyyd und Greessewaan,
Kippa, Gryz und Ramadaan
Sorge scho syt alte Zyte
Drfiir, ass d Mensche zämme strytte.
Us Fääler het bis hitte niemer
Eppis gleert. Und jetz wie friener
Kämpft me um die glyyche Sache.
Drbyy het niemerts ebbis z lache:
Am Schluss gwinnt kain, und vill mien stäärbe;
Em Volgg blybbt numme no s Verdäärbe.
Und d Gschicht, die repetiert sich siider
Immer und immer und immer wiider.
Mr sin ys also gwoont ass s nit
So eifach wider Friide git.
Aber jetz dr Neyscht: s isch ganz verruggt!
Es isch e Leesig neechergruggt!
Syt kurzem kenne sich die maischte
Dr ganz perseenlig Friide Iaischte!
Mit some farbefrooe Faane
Ka jede dr Wäg zum Friide baane!
Zum Friide hän esoo die maischte
Iire Byydraag welle laischte.
Hän d Faane vor iir Fanschter ghänggt,
Und dänggt fir sich: «Hejoo das länggt!
Jetz goot mi s Thema nyt me aa.»
S Gwissen isch beruigt; me ka
Jetz ändlig wider friidlig pfuuse.
E Dail geen no uf d Strossen uuse
Go demonschtriere und go steere
Und d Anarchie herufbeschweere.
Me froogt ain vo de junge Mensche,
Wo brielend demonschtriere: «Kennsch e
Wäg, wo wurd zum Friide fiere?»
Dr Schieler tuet sich fascht schiniere
Won er gschwind dr Joint versteggt
Und e Momänt lang iberleggt.
Är zeegeret und d Auge glänze:
«Me kennti jo e Schuelstund schwänze;
Und am Barfi drfiir soorge,
Dass sicher wäred em ganze Morge
Kaini Drämmli duurekenne!
Peace und tschau – I mues go penne!»
Me froggt au d Lyt wo ummesteen,
Wie sy denne d Zuekunft seen.
Was me kennti undernää
As es gly wurd Friide gää.
E lingge Nätte sait, do fänd er
E Faane guet am Balkongländer!
S syg wichtig as me Zeiche setzt,
Well s tiefe Mitgfyyl wurdi gschetzt,
Und as me au no zymftig motzi,
Dass alli seen me isch e Sotzi!
Trotz allem bombardiert dr Bush
D Taliban im Hindukusch,
S Husseíns us iir› ne Schlösser,
Mit samt em Prunk und Gold und Rösser.
E Paläschtinänser het sich gsprängt!
Und ob die Noochricht nit scho länggt,
S verliere zwelf Israeli s Lääbe!
Dr CIA spannt wyter Fääde
Zem s Land vor Terrorismus z schitze.
Me ka s Sozial und d Schuel nit stitze
Will me d Mittel bruucht fir d Rischtig.
S Volgg isch iberhaupt nit wichtig.
Bi uns – do merkt me nyt vo däm.
Wurscht sin d Plään vom Unggle Sam.
S isch Zyyg, wo nit do aane gheert;
Me fyylt sich in sym Friide gsteert.
D Fääne sin verbleicht, verrisse,
Niemerts tuet me eine hisse.
D Friidensmode isch verbyy,
Au s demonschtriere losst me syy.
Wie d Affe us em färnen Oschte,
Tuet me vor sich aaneroschte.
Me heert und seet und sayt nyt me,
Tuet sin i Zyt ganz and›rem widme.
Wie d Affe schitzt me sich vom Beese:
Die Problem sin doch nit z leese!
Me isch jo nit diräggt betroffe!
Nodiirlig tuet me wyterhoffe,
Dass s Beese bald en Ändi findet,
Gly kaine me dr ander schindet.
Nur eins, das wott me ganz entschiide:
«Leend ys bitte unsere Friide!»