A Palermo uff bella Sicilia unde,
hett me speeter uusegfunde,
trifft dr Gino drey noobli Heere,
wo zun ere bsundere Gsellschaft gheere.
Mit schwarzem Huet und gstraiftem Kittel,
wysse Schueh wie d'Ärzt im Spittel,
steehn die drey vor uns'rem Gino,
gschiggt vom Boss, em Don Bacino.
Stolz schweert er uff alli Zyte,
fir d' Ehr vo dääre Gsellschaft z' stryte
und nie au numme ain z' verpfyffe,
sunscht wurd me syyny Aier schlyffe.

Zerscht muess unsere Benjamino
zämme mit sym Frind, em Dino,
by glaine Lääde Gäld yydryybe.
Wär nai zem Schutz sait, fliegt dur d'Schyybe.
E sulla piazza – uff dr Syte
laufe dääglig fuffzäh Grytte,
doch uffpasst, kasch die Fraid nit zahle,
gitt 's vom Gino ibly Quaale.

Als Mitgliid muesch dy uffeschaffe,
maint dr Gino und paggd sy Waffe,
denn d'Gsellschaft wett, dass er jetzt ziiglet
und Missständ oobe z'Mailand biiglet.
Derte schiggd me haissi Lire
uff Schwyzer Bangge statt in d' Styyre.
Doch sinn Beamty dääre Sach
uff d' Schlichy koh und mache Krach.
Dr Gino bruucht nit lang zem dängge
und loot de Heere Hyysli schängge.
Jetzt sinn sii wiider bravi Lämmli,
fahren Auti anstatt Drämmli,
e sulla Banca di Ticino.
fliesst d' Lira wiider dangg em Gino.

Das het me schliesslig z'Rom vernoh
und Achtig vor däm Held bykoh.
Soo styggd er uff in d'Gsellschaftsfyehrig
und mit iim Kepf uss dr Regierig
– jä sogar dr Presidente
kocht me waich, genau al dente –
soo dass schlussändlig nimme waisch,
in welli Kasse d' Styyre draisch.

Dr Gino stooht jetzt vor dr Greenig,
z' Rom gilt er scho lang als Keenig.
Doch maint er denn, mi zieht 's in Oschde,
dert gitt's hitt dr Saft bym Moschde.
No aimool ganz vo vorn' aafoo
und langsam dert ze Ehre koo,
das weggd bim Ginos Kämpferhärz
und e weeneli au dr Abschiidsschmärz.

«Gesagt, getan» – ganz ohni Gschlotter –
wird uss Gino rasch dr Pjotr,
und kuum fimf Joor nach Perestrojka
hett d'Gsellschaft wiider Gäld wie Heu ka.
Dä neyi Määrt ganz wie im Weschde
isch fir grummy Gschäftli 's beschde.
Doch kunnt au dert nur uss dr Kryyse,
wär handle kaa mit Weschddevyyse.

Drum gitt's jetzt au scho in dr Schwyz
die Mafiabrieder,'s isch e Kryz.
De findsch si wirglig iberaal:
in Firme, Zinft, bi 'r Sujetwahl.
Mir gheere nämmlig au drzue
und leen au dii jetzt nimm' in Rue,
denn d'Lääser vo dr Zeedelgschicht
hänn mir samt Fotty im e Bricht.
Wettsch, dass mir dii wiider stryyche
und nit vor Angscht muesch ummeschlyyche,
zahlsch uns aifach – und zwor pronto –
fuffzig Schtai uff unser Konto.


Seibi Mysli
E ehrewäärti (Fasnachts-)Gsellschaft Basel
PC 40-22078-9