Wenn in dr Zytig alli lache
und grampfhaft frindligi Gsichter mache,
wenn pletzlig jede d'Leesig hett
und numme 's Beseht fir Basel wett,
wenn Rächti iber Linggi klaage
und d'Mitti sich vo Gott lot draage,
wenn dank PS sellsch freyer sy
(y glaub, die bikemme d'Rächnig glyy,
wenn alli's Blaue vom Himmel verspräche
und do drfir e Lanze bräche,
denn stehn mr vor dr näggschde Wahl
und d'Zyt drvor wird faseht zer Quaal.

Braavi Kepf im Hochformat
lachen uff jedem Wahlplakat,
e Lächlen au fir's Inserat,
das wirggt seriees und moderat.

Dr Ueli V. goht and'ri Wääg
und setzt sy Hoffnig uff e Gääg,
ass mit em Sofa in dr BaZ,
drzue e kurze schlaue Satz,
dä Sitz im «Stöckli» z'mache wär,
was nohäär kunnt, isch halb so schwäär.

Do hoggt är also glatt rasiert,
gitt sich witzig, engagiert
und bittet d'Crème so noodysnoo,
kurz ze ihm uff 's Sofa z'koo.
Wärbetechnisch ganz gezyylt
wird so am Vischer Image gfyylt,
bis alli Grubbe z' Wort sinn koo,
wo kennte an die Wahle goh.
Dr Kugelsteesser Werni G.
will 's sportlig Bild vom Ueli gseh,
e Schuggermysli darf denn frooge,
wie 's wyter goht in Sache Drooge,
dr Karli O. maint insgesamt,
eb är nit z' jung isch fir das Amt,
und 's Trudi G. wett anstatt schneere
nur e kurzes Maarli gheere.

D' Antworte blyybe wie gsait kurz,
statt Gaischt kunnt nur e warme Furz.
Vyyl wichtiger isch d' Reklaamefluet,
e Huuffe Stutz und wenig Muet.
E Wähler kauft me hitten yy,
mir isch do nimme wohl drbyy,
ass nur mit Gäld ze Ehre kunsch -
do blybbt dr Gaischt e fromme Wunsch.

Die Daadsach kunnt mr aifach vor,
äxgyysi, aber 's isch doch wohr,
wie d'Kaifligkait vo gwisse Daame
(au bi dääne spielt d' Reklaame),
wo willig sinn fir zwai drey Labbe –
bald so vyyl muess me hitt berabbe,
zem d' Luscht bi nur aim Wähler z' wegge,
e Namme dief in d' Urne z' stegge.

In Zuekunft also kaa 's drum syy,
ass uff dr näggschde Fläsche Wyy,
an alle grosse Rockkonzärt,
uff jedem Muschter ohni Wärt,
am Flugi, Bus und Drämmliwaage,
am Hooseschlitz und Hemmligraage,
e Kandidat um Stimme wirbt,
und statt dr gitt, dr d' Luscht verdirbt,
bis 's Hyylen alle z' vorderscht stoht
und niemerts meh an d' Wahle goht.

Zem nomool zrugg uff 's Sofa z' koo:
das Meebel hett sy Dienscht scho doo,
denn ganz zem Schluss blybbt gottseidangg
e Platz uff dr Regierigsbangg.