Kuum hesch an Wiehnacht in Ranze biige,
(und no-n-em Silvester kasch nur no liige),
kunnt mit em Duft vo Faschtewaie
und em Grampf e Goschdym z'naie,
die heerlig Zyt vo de Fasnachtstheater,
vrbyy isch ändlig dr grossi Kaater.

Tout Bâle isch drnoo vom Virus bsässe.
E mängge maag scho gar nimm ässe.
Eb Pfyfferli oder Räppliserenade
griegsch sicher's erscht Mool waichi Waade,
wenn Fasnachtszauber Di erfillt
und's Härz Dr ebbe dreyfach gschwillt.
D'Greenig losch Dr nit entgoo,
wenn d'Primas dien uff d'Bihni stoo,
denn fir d'Pf.- und Drummelkeenig
isch's Pertäggde als no z'wenig.
Wenn's Charivari ins Volggshuus laadet
und dr Plebbs im Jubel baadet,
bisch sälbverständlig dert drbyy,
syg's nur fir d'Pause und e Wyy.
Drnoo die vyyle Drummeli-Dääg –
so langsam fyyhlsch Di haillos zwääg.

Doch siibe Nächt vor em Vieri-Schlaag,
wenn jede Bebbi no meeh maag,
kunnt unvermyydlig's Änd vom Draum,
's isch wie-n-e Fall vom hooche Baum.
Rien ne va plus, uff aimool isch umme –
Theater, Konzärtli dien aifach verstumme.
Dä Zuestand isch ibel und schloot uff e Maage,
fir up-to-date-people kuum meh z' erdraage.
Drum sell das im 90 anderscht sy,
und wird's e Hit, denn blybbt's drbyy,
ass's SUJEITLI in die Lugge springt,
bis d'Fasnacht ys d'Erfillig bringt.

Was sell das, wärde d'Gruftis stuune
Iyycht perplex mit suurer Luune.
Doch kimmere mir ys nit um die
und spaare ys drbyy die Mieh.
'S Verlange isch jo als no styygend,
d'ldee drzue isch iberzyygend,
ass näbem Rädäbäng in Zuekunft
die optisch Fassig no drzuekunnt.

Dr Uffbau vom Oobe isch rasch beschriibe,
vo Perle z'rede nit iberdriibe.
Am Barfi im grosse Casinosaal
drädde Glygge uff nach bstimmter Wahl.
Dr Obmaa liist dr Zeedel vor,
drhinder summt e Fasnachtschor
und untermool mit fyyne Deen,
was vyyli erscht am Cortege seehn.
Underem Schyyn vom Latärnehelge,
dien d'Glygge iber d'Bihni schwelge
und zaige d'Goschdym-Creatione –
essoo duet sich die Arbet lohne.

Hit wo numme's Bild vo Wärt isch
und fir Lääse nimm Dy Gäld gisch,
liggsch mit dääre Gold-Idee
gnau im Trend, de wirdsch es seeh.
Syg drum kai Grufti, zaig Dy «in»
und gschpyyr die gueti Sach do drin.
Mir Mysli dien Dr ains verspräche,
mr setzen alles draa zem Bschtäche.
'S SUJETTLI gheert drum in jeede Kaländer,
au 's Radio sait 's no uff sym Sänder.
Also Bebbi, me seeht sich glyy,
mr hoffe, syygsch denn au drbyy.