Fasnacht 18. – 20. Hornig 2013

Sujet:

JEEDE RÄSCHTE ZELLT!

Wisse dir genau wie krumm

E Gurgge waggse darf? S isch dumm:

Si darf nur graad am Pflänzli hange

Sunsch mues si um dr Märtwärt bange!

lsch si graad, kunnt si ins Tepfli,

lsch si krumm, denn ab ins Krepfli!

So Gurgge sinn zwar faadegraad

Schmegge aber zimmlig faad.

Au d Epfel mien, vor d si kasch kaufe,

E Scheenhaitswettbewärb durlaufe.

S bruucht scheeni Kurve, rund und glatt,

Perfäggti Hutt, vor Saft ganz satt.

Klass 1 git s nur bi Perfäggtion

E jeden Epfel isch e Kloon.

So goot s mit alle Lääbensmittel.

S git Norme, wo vo Lytt im Kittel

Am Schrybtisch gschwind beschlosse wärde –

Ooni Bezuug zur Muetter Ärde!

S kunnt aimol mee grad nur druff aa,

Was me guet vermäärte kaa.

So fangt scho bi dr Produggtion

D Verschwändig aa. Es isch e Hoon

Fir alli, wo nyt z Ässe hänn

Und aifach iberlääbe wänn.

 

Wenn d Gurgge denn im Laade liggt,

Im Plastik inne fascht verstiggt,

Denn hofft si, dass Si meegligscht hit no

Vom e guete Kund wird mitgno.

Blybbt si aber zwai Daag ligge

Mues me si scho s Loch ab schigge!

Si isch zwar grien und gsund und frisch

Und sicher gniessbar uf em Tisch.

Nur niemer wott e Gurgge boschte,

Wo nach kurzer Zyt tuet roschte!

So lauft das mit em Ablaufdatum

S isch fir s Ässe s Ultimatum:

lauft s Datum ab, no git s kai Gnaad

S kunnt alles wäg, es isch so schaad,

In Abfall mit, und furt und wäg!

Vom Ässe blybt nur Gstangg und Drägg.

S Datum isch nur d Garantie:

Perfäggt soll s Ässe bis denn syy.

Nur seer vyyl lenger kennt me s gniesse,

Tuet s aber lieber grad furt schiesse.

 

Do lueg, die Gurgge wird jetzt kauft,

No vor die kurzi Frischt ablauft!

Si liggt stolz im Yykaufswaage;

Me heert si still zum Riebli saage:

Mi Lääbe isch nimm desolaat!

Ych änd jetzt glyych no im Salaat!

S Riebli lacht: Das wämmer hoffe!

Im Stille dänggt s, s isch alles offe...

Die näggschti Hirde stoot bevoor:

Dr Yyskaschte isch doch e Gfoor!

So gammlet d Gurgge vor sich aane –

Syt Wuche scho, näb dr Banane –

Und wartet bang uf s letschte Gricht!

Wie ändet äggscht die Lääbensgschicht?

Was wird s äggscht Feyns zem Ässe sy?

E gmischt Saläätli, Tsatsiki?

He nyt vo dämm, mir hänn s gsee koo!

D Gurgge wird in Abfall gloo.

 

So verschwindet guet e Drittel

Vo alle unsre Lääbensmittel!

Nit nur Gmies, nai, Fleisch und Broot,

Milch und Kääs, s seen alli root.

E Dail wird bi dr Ärnt usgschaubt,

Will verformt und nit erlaubt.

Verluscht git s au bim Transportiere

Und bim für d Lääde ussortiere.

Am maischte wird dehaim verschwändet,

Z vyyl Ässe kauft und nit verwändet.

Bi Unluscht, libergwicht und Zytnoot

Ka s passiere, as me s syy loot,

D Voorreet z koche und si z mampfe.

Stattdesse lasst me si yystampfe.

Es sinn pro Kopf - und das isch woor! –

Fascht hundert Kilo iber s Joor!

Anderscht grächnet heisst das – gopf! –

E Moolzytt grad pro Daag pro Kopf!

Es verstoot sich jo vo sälber,

Was das heisst fir d Huushaltsgälder!

 

So Zueständ hänn, s liggt uf dr Hand,

Mit Ethik z tue und em Verstand.

Mir wänn drum jetzt s Bewusstsyy wegge,

Dr Konsumänt drvo abschregge,

Derart z verschwände. S git e Chance!

Mr luege zrugg in d Renaissance!

E Kinschtler*, bis hitt unvergässe,

Het Bilder gmoolt us lutter Ässe.

Gsichter, Kepf us Lääbensmittel

Stiillääbe fir dr Huet und Kittel.

Är het em Ässe d Seel yyghuucht!

lsch s nit grad das, was s au hitt bruucht?

Het s Ässe nit e Seel, e Gsicht?

Was isch denn wirgglig «S letschte Gricht?»

Dr Abfall ka nit d Leesig syy.

Drum schleen mir vor – bisch au drbyy? –

Ern Ässe tief in d Auge z luege

Vor me s wott in Abfall fuege!

 

* Giuseppe Arcimboldo (1526- 1593)