Fasnacht 14. – 16. März 2011

Sujet:

Die letschti Oelig

Dä Zeedel wird vom Inhalt häär

Fascht zue banal und ordinäär –

Es goot um s Beese in dr Wält

In Form vo Oel und vyl zvyl Gäld.

Es goot um d Opfer, wo mien lyyde,

Um d Methode, die perfyyde,

Zem d Wooret z biege und z beschnyyde;

Um d Schurnalischte, wo vermyyde,

Dass me erfaart, wie s wirgglig isch,

Was d Grind sin fir die toote Fisch.

S goot um d Natur, d Oekologie

Um Aigenutz, Egomanie.

Es goot au um d Bedroffehait,

Dr Läbensstandard, d Suuberkait,

Was äggscht vor allem Vorrang het,

Was ethisch me verträtte sett.

Es goot vo «jede Rappe zellt»

Zem «Der, wo zahlt, regiert die Welt»;

Wär rede darf, wär schwyyge sett,

Wär liege muess, wär s Sage het.

Wie s Wappedier vom Oelungligg

Klääbe d Pelikään im Schligg.

Kei Wäsche – Leege bringt no Nutze –

Die Dierli kasch nimm suuber butze.

Z hoffen isch, si wärde seelig

Wäge däre letschten Oelig!

Um d Fischer goot s, die arme Drepf

S git nyt me z hoole fir in d Depf.

Bitz Cash zum Trooscht griege sy gsteggt

Und wärde so ganz aifach gleggt.

«You are not victims» wird ’ne gsait

«Survivors» haissi d Wirggligkait.

Wie immer bi so Katastrophe,

Ka unserain rueig wytter schloofe.

S isch wytt ewägg, Protäscht nutzt nyt,

Schlächt goot s zem Gligg den and’re Lytt.

So goot s denn in däm Zeedel au

Um s Vergässe vo däm Gau.

Um s Wytterläbe, s nimm dra Dängge

Dr näggschte Froog s Int‘rässe schängge.

So waiss hit niemer wie s denn stoot

Im Golf, in syner grosse Noot.

S ainzig, wo jetzt d Zyttig brichtet,

Isch, was Russland ney aarichtet.

D Arktis wänn si unverfroore

Nach em schwarze Oel durboore.

S isch BP, wo s fir Russland richtet.

Die wisse scho, wie me vernichtet.

 

Das Sujet blybt ganz ooni Hoon,

Es het nur grad ai Dimension:

Schlimm isch alles, s git nyt z rittle

S blybt aim nur dr Kopf bitz z schittle.

S het kei Platz fi r Ironie,

Au s Witzle leen mr lieber sy.

Drum sag i jo, iir liebe Lytt

Im unserem Zeedel goot s um nyt!

Drum loon ich s Dichte lieber blyybe

Und fang scho gar nit aa mit schryybe.

 

Note:

No ortography rules from R. Suter 2nd edition

were harmed intentionally in this text.