Fasnacht 14. – 16. Hornig 2005

Sujet:

Vollfett! oder:
Adipositas, was isch denn das?

Das lange 'A'-Wort us em Titel,

Erkennt nur ein im wysse Kittel.

Es heisst so vyyl wie 'krangg vom Ässe'

Und: 'e Heilig kasch vergässe'.

En Euphemismus sonderglyyche

Wo dr Wooret wott uswyyche.

Will 'digg' isch so nim akzeptabel,

Me bruucht e wisseschaftlig Label.

Diggi Mensche tuet s benenne

Wo laider kaini Granze kenne

Wenn s um s sich Ernääre goot.

Jetz pletzlig seet me aber root,

S Problem betrifft syt neyschtem Kinder,

Wo erschreggend rund und rinder

Wärde! S findet sich d Erkläärig

S isch eppis falsch mit der Ernäärig.

Wie vyyll so Iibel, so modärni,

Kunnt au s Fast Food us dr Färni.

Z Amerika wird s usprobiert

Und denn z Europa grad kopiert.

Es isch zwar ungsund, furchtbar gruusig,

Macht rooti Kinderbagge pfuusig,

Schlanggi Maitli wärde Bränte,

Gfitzti Biebli laami Änte.

Trotz de iible Konsequänze,

Feen Kinderauge afo glänze,

Wenn si s goldig M entdegge!

Obwohl d an däm Fraass kentsch verregge!

Im Film het s eine usprobiert

Und isch drby jo fascht krepiert!

Das beydruggt d Kinder wenig

Si fraie sich uf d M Verweenig.

S Sagggäld dient zum Börger kaufe,

Und d Pommes frisst me grad im Laufe.

Drzue kunnt: scho im Kinderhort

Tryybe d Kinder z wenig Sport:

Es fäält de Glaine an Beweegig.

Si luege hyffig ooni Reegig

Stundelang in Bildschirm yyne.

Drbyy wurd dusse d Sunne schyyne!

Si spiile Fangis virtuell,

Und unberiert blybt s Velogstell.

Bald jede Schritt wird aifach z vyyl,

Nur s Telefon isch no mobil!

E jedem blybt dr Purzelbaum

En unerfillte Kindertraum.

Wie allewyl bi däne Theme

Lauft aIles nach de glyyche Scheme:

D Präss merkt, as do e Problem isch:

E Krangget verbreitet sich epidemisch!

D Kranggekasse schleen Alarm:

Die Digge frässen ys no arm!

Dr Härzinfarkt isch programmiert,

Wenn me d Zueständ nit saniert!

S Volgg griegt Angscht und wird hysterisch:

Es darf nit syy, as epper schweer isch!

Nach Raaser, Tschankys, gsteerte Rinder,

D Find sin neyschtens diggi Kinder!

Me isch sich ainig, das mues ände,

S Ässe darf me nit verschwände!

E Schrybtischtäter uf sim Stuel

Beschliesst: dasch d Ufgob vo dr Schuel!

Me mues de Kinder go erklääre,

Wie me sich tuet gsund ernääre,

Will d Eltere wisse s nirn gerwu.

Drum schiggt me näbscht dr Zaanbutzfrau

E wytteri Tante zue de Klasse,

Wo sait, mit Ässe syg nit z spasse.

Si leert, dr Zugger miechi sichtig,

Und frisches Gmies syg enorm wichtig.

Si maint au, so ka d Wält nim stimme

Dass die, wo geen im Gäld go schwimme,

Die dinnschte sin und sich mien hetze

Meegligscht wenig Gwicht azsetze.

Drbyy tien doch die Arme klage,

Dass sii am Hungertuech mien nage!

S isch chic e Trainer z engagiere

Zum s Wellnessprogramm duurezfiere.

Sich s Fett absuuge oder bitzi

Straffe mit dr Bottoxspritzi

Gheert zum Alltag. S isch normal,

Dass Mensche im Original

Wiescht sin und nadyyrlig so

Uf em Märt nit tien bestoo.

Drum kenne sich scho bald die maischte

E dinne Keerper gar nim laischte!

Mr sin verweent, s git kaini Gränze,

Drum sin jo au die Konsequänze

E vellige Verheltnisssaich,

Pervärs, absurd und biirewaich!

S Problem seen mir trotz allem nit.

Im Gegedail, s isch doch dr Hit,

As es bi däm Luxus nit

Nur no diggi Mensche git!