Fasnacht 18. – 20. Hornig 2002

Sujet:

DIE DRITT HALBZYT

S Altwärde isch an sich scho schwäär,

no schwäärer isch's mit Bräschte,

und sottsch dernoo ins Altershaim,

git das dir grad dr Räschte.

 

Zwar sin die schlimme Zytte lengschtens umme,

wo's Dy versteggt hän vor de Muure vo de Stedt;

bisch zämme gsi mit Blinde, Grangge, Dumme

im Siechehuus - und das sälbs dritt im Bett.

 

Dasch alles anderscht jetzt – und denn no wie:

Statt "Siechehuus" saisch "Altersresidänz'" ,

En arme Siech driffsch dert drum wohrschynt's nie –

scho eehnder gstopfti Basler Prominänz.

 

Gfroggt isch e Huus mit Stil an lärmig-luutter Laag,

verbyy isch's mit em ruehige Haim am Wald.

"In" isch en Ort, wo ebbis gooht dr lang, lieb Daag,

denn sunscht verwelgge d'Maierysli bald.

En Ort, wo Töff und Auti durebloche,

wo Yykaufskunde s Gald verloche,

wo Clochard uff de Bänggli penne

und Grufti unders Drämmli renne.

 

Grad nääbem Siechehuus stooht so ne Paradies uff Aerde,

mit Namme "Tertianum" – das deent flott.

Doch bruucht me laider, um dert uffgnooh z'wärde

e Konto, wo gnueg druff sy sott.

 

Me residiert denn in gedigener Umgääbig,

und wenn kai Matsch isch, isch es richtig still.

Im erschten UG sorge Lääde fir d'Verpfläägig

und bieten alles, was es Pensionär so will.

 

Dr Männi Schaub isch ain vo dääne gstopfte Heere,

wo findet: «Sone tolli Wohnig muess ych ha;

wenn dert au gschuuttet wird, kan ych sogar no leehre,

au ych pfyff nämmlig jetzt my dritti Halbzyt aa.»

 

Aer dyschlet s rot-blau LyybIi mit dr dunggle Schale

und kauft e Saisonkarte zmitts im Seggtor E.

Freywillig duet er no e Genner-Byydraag zahle

und zellt sich ney jetzt zu de Fän vom FCB.

 

Statistigge beleege's scho sit Joore:

In Altershaim isch's stargge Gschlächt seehr rar.

Dä Fraueniberschuss bringt ärnschti Gfohre,

will d'Männer Freywild sin ganz offebaar.

 

Dr Männi isch zem Gligg kai Koschtverächter

und drillt sich hit no um nach jeedem kurze Rogg.

Sy guete Ruef wird wääge dam halt als wie schlächter

und hindedure haisst men ihn dr rot-blau Bogg.

 

In warme Summernächt drybbt är's sogar im Garte,

hinderem Fyyrbusch – und zwar bis am Morge frieh.

Fir das seeht unsere Frind nadyrlig die gääl Karte

und dä Verstooss duet none Arbet nooch sich zieh.

 

Will's halt nyt Bessers git uff d'Duur

Als Raase - gmacht vo dr Natur -,

muess är trotz Rheuma und Gebräche

z'Brüglige Raaseziegel stäche.

 

S ganz Huus het härzlig driber glacht:

So wird dr Bogg zum Gartner gmacht!