Fasnacht 22. – 24. Hornig 1988

Sujet:

Dr Globus als Tadsch Mahal
oder e indisch Määrli in Basel

Wenn d'Diräggder im Globi aafehn klaage

sy miesse am Hungerduech go gnaage,

d Buechhalter mien Bilanze biege,

d Verkaifer Ranzepfyffe griege,

will d Umsetz aifach nimmi stimme

und mit dr Waar nyt me kasch gwinne,

denn foht me aa, sich z'iberlege,

wie me d Kaufluscht kennt aareege.

 

Wäärbefritze, gfitzti Käärli

Mänätscherinne, zem Byspiil s Kläärli,

zwai Verkaufsstratege kemme-n-au

und gänn dr ganze Sach s KNOW-HOW.

Sy hogge sich an Disch an runde,

und warte (will ain isch go pfunde),

denn raucht me, hirnt und schreyt sich aa,

will kain dr ander schmegge kaa.

 

Aendligg duet aim d Kerze schpritze

die andere dien en unterstitze,

mit vergläärtem Bligg duet är verkinde:

«Mer pagge d Kunde jetzt vo hinde

und wegge esoo in jedem Käärli

sy Kindhaitsdraum, dä noh-n-em Määrli!

Mer kennte's wenigschtens probiere,

e-n-Indie-Wuche z'propagiere.

Dr Vordail liggt doch uff dr Hand:

e Waarehuus als Määrliland!»

 

Im Ruum wird's pletzlig myslistill,

will kaine ebbis saage will.

Denn stoht ain uff, foht aa verzelle :

«Das ha-n-y au grad saage welle!»

Vo wämm d Idee syg, isch nimm wichtig,

wichtig isch jetzt nur no d Richtig,

wie d Mänätscher die Idee lehn laufe,

(sy wann jo schliesslig meh verkaufe.)

 

Uusem Globus wird, es isch fatal,

in kurzer Zyt dr Tadsch-Mahal.

In dr Deggo wird verbisse grampft:

Kulisse-n-uusem Boode gstampft.

D Yykaifer raise umme-n-and

und kaufe Waar vo Land zue Land.

Und findet ain das syg nit indisch,

denn sait dr Ander: « Syg nit kindisch –

das merggt doch kaine, nundefahne,

das Zyyg isch ginschtig, das muess aane!»

 

Ganz Basel hett denn fyrlig gwartet

ass me d'lndie-Wuche startet.

Lueg was me alles kaufe kaa

(muesch nur dr neetig Pulver haa):

ghaimnisvolli Barfyymfläschli

(gheert in jedes Dametäschli),

«SARIS» zem dr Maa verfiehre

(s'kennt zwoor s'Gägedail bassiere),

Schmugg und Syyde griegsch fascht gschänggt

(voruusgsetzt ass dr s Gäld no länggt);

Deppig, Vaase, Hääfe, Gwiirz,

Biecher, Turbän, anderi Fiirz.

 

Au kulturell wird ebbis botte

(me hätt's halt nur go luege sotte):

Uusstellige, Theater, Danz

und e ganze Ratteschwanz

vo verschiidene Aggzione,

wo sich s Luege wurdi lohne.

 

So wird an Kunde uusprobiert,

wie me sii mit Draim verfiehrt.

S Gäld gisch uus im Globi-Bau

wie im Draum, gang froog my Frau!

Und frogsch dy, was das alles bringt,

wenn ain uff indisch Liedli singt?

Oder frogsch dy, koschtet das nit Gäld?

He, gschänggt griegsch nyt uff däre Wält!

D Idee syg guet gsi, d Kasse voll,

d Diräggder grinse ghaimnisvoll,

scho fehn sie aa, hesch's kenne aahne,

e groossi ASIE-Wuche * z'plaane!

 

*(Doo kasch yysetze, was de witt:

USA, RUSSLAND, CHINA, LAPPLAND, LlECHTESTAI, GLAIHYYNIGE, und so wyter)