Fasnacht 25. – 27. Hornig 1985

Sujet:

Bisch au im elan vo Dotel-Fan?

a)

Bisch e Maa, bisch e Frau?

(Wenn D e Kind bisch, goht's au.)

Bref, bisch ergo e Mitgliid vom menschlige Gschlächt?

Hesch e Sproch und finf Sinn

und e Kopf und nyt dinn?

Denn isch guet, denn liggsch gar nit so schlächt.

 

b)

Bisch meh dimmlig als gscheyt?

Isch Der d Schuel abverheyt,

und zer zwaite Primar bisch scho gar nimme ko?

Isch Der Bildig suspäggt,

will sy Kopflaschtigs pfläggt?

Denn isch guet, numme wyter eso.

 

c)

Hesch e Färnseh dehai?

Oder hesch sogar zwai?

Und dr Knopf, wo me-n-abstellt, in Reperatur?

Luegsch am Änd – 's isch e Kryz –

au s Programm vo dr Schwyz?

Dasch dr Hit, De bisch als no à jour.

 

D Bedingige a, b und c hesch erfillt,

und villicht bisch es tatsächlig Du, wo mer sueche.

Was saisch, De waisch gar nit, um was es sich drillt?

Wart's doch ab, wenn D's denn waisch, hesch no gnueg Zyt zem Flueche.

 

d)

Hesch's gärn bleed und banal?

Findsch es miehsam und qualvoll,

wenn ebbe-n-emol ebbis Sinnvolls passiert?

Bisch vom Dumme ganz bsässe?

Und mechtsch es vergässe,

dass Heechers halt au existiert?

 

e)

Bisch e Frind vom Stupide?

Probiersch es z'vermyde,

au ab und zue halbwäggs Vernimftigs z'goutiere?

Bisch gärn primitiv,

infantil und naiv?

Sinn's Skandäli, wo Di intressiere?

 

f)

Heersch gärn Ziiridytsch rede

und Bärndytsch? Uff jede

Fall nyt, wo so teent wie-n-e gsitteti Sproch?

Saisch au sälber bim Schwätze

fascht allewyl s Lätze?

Und maischtens kunnsch gar nit rächt noch?

 

Denn isch guet, denn erfilIsch au d Pinggt, d, e und f.

De bisch also au jetzt no fir uns Kandidat.

Waisch denn als noni sicher, fir was? Kurz und bref:

Y sag 's noni. 's goht wyter im Täggscht. Bisch parat?

 

g)

Bisch au aine vo däne wo griehrt isch zue Träne,

wenn irgend e Koch in dr Gmiessuppe riehrt?

Oder ghersch zue dr Art

vo so Lyt, wo's apart

findt, wenn aine-n-e Butzfrau verfiehrt?

 

h)

Finsch es spannend und toll,

wenn e Glas, will 's halt z'voll

isch, duet ibereschwabbe und 's Wyflägge git?

Oder sait's Der vyl meh,

wenn D am T.V. kasch seh,

dass e Rechaud nit lauft ohni Sprit?

 

i)

Dunggt's Dy unhaimlig lessig,

wenn D luegsch, wie sich Essig

mit Eel und mit Salz zer Salatsauce aint?

Nimmsch, will's fad wär ganz ohni,

derzue Pepperoni?

(Was sicher kai Gourmet vernaint.)

 

Denn erfillsch au die letschte Pinggt g, h und i.

Jä, Du bisch es! Dr Super-extrem-Ober-Fan

vo dr sensationellschtischte Färnseh-Serie.

Du bisch s Ehremitgliid vo dämm Dotel-Fan-Clan!

 

Jä Du, muesch nit lache, dä Fän-Club, dä gitt's.

In Ziri hett ain die Verainigung grindet.

Und mi hett er bätte, es tent wie-n-e Witz,

dass em hilf, dass er ändlig au Mitgliider findet.

 

Erbarm Dy, my Frind, und tritt by dämm Verain.

Dr Fan-Club, dä läbt, isch au s Dotel scho doot.

Fir was er bestoht, waiss ganz gwiss zwor e kain.

Nu, villicht isch 's au guet, wenn dass niemer verstoht …