Fasnacht 1. – 3. März 1982

altes Logo Seibi-Mysli

Sujet:

Mir mache Fasnacht nit uff Bumpp

Die ganzi Wält läbbt hit uff Bumpp

Derzue macht mänge e grosse Gumpp

Aene am Bach isch das joo Mode,

Mir doo hänn en anderi Methode.

 

Mit «Dinerscheck» gehn vyl go schmure,

Drby lääbe si maischtens undedure,

Zem aagää bläche si nit in bar,

S basst zem «Grand Diner» mit Kaviar.

 

Uns ka me doo vyl meh erfraie,

Mit Mählsuppe und mit Zibelewaie,

Dä Duft jaggd is in sibte Himmel,

Mir Basler hänn dr Fasnachtsfimmel.

 

Friehjer isch s ebben emool bassiert,

Ass men isch uff d Gant spaziert,

Het abgää derte allergattig Sache,

Mit däm Glotz isch me goo Fasnacht mache.

 

Mir spare dur s Johr in e Kässeli,

Dernoo isch d Fasnacht fir uns e Frässeli,

In s Goschdym styge mer drum ohni Sorge,

Alles lauft 91att bis am Donnschtig demorge.

 

Leggt aine emool e herlig fyr,

Isch e Goschdym-Ykauf au nit dyr,

S isch noo billiger wiene Usverkauf,

Mir fraue griege doo dr Lauf.

 

Die Gleen woo bi uns dien laufe,

Sinn alles nummen in bar go kaufe,

Sie lehn sich ganz nit loo lumppe,

Si pfyffe, dien uss Fraid noo gumppe.

 

Bumppkarte bruuche mir drum noni,

Bim «sälbschtbediene» gohts au ohni,

Doch muess men e suuber Gwisse ha,

Me lauft zer Kasse und nit näbedra.

 

Dr Hanspi R. het anderscht dänggt,

Haig doo und dert in d Kasse glänggt,

Soo het är gsammlet e Huffe Gäld,

Aber nit ebbe fir die Dritti Wält.

 

D Fasnacht stryche mir nie ans Bai,

Ob mer numme ai Stutz hänn od,er zwai,

Fir uns isch d Fasnacht s'scheenschti Ibel,

Nie hät die Blatz imene Ochsner-Kibel.