Fasnacht 8. – 10. März 1976

altes Logo Seibi-Mysli

Sujet:

5 Johr Seibi Mysli

Aggtiöönli – Luftballöönli

Iberall an alle Egge

spart dr Schaggi, s spart dr Megge,

s spare alli, s spart e jede,

s spart dr Staat bis zem Verbleede,

und fir alles, s isch nit glooge,

wird en Aggtioon uffzooge:

Aggtioon fir Kinderwäge,

nie isch s Buschi waicher gläge.

Aggtioon fir Hueschtetee.

Druggnepf, Ferie amene See,

Wägwärfglaider und Zitröönli.

Essiggurgge, Luftballöönli,

fir zwanzig Centimes Eelsardiine,

Honig vo de Filippiine,

Anggerbier in Blastiggfläsche,

Im ACV gits gratis Däsche,

d Glepfer kaufsch nur no am Meter,

fir Kinder gits e sehwarze Peter

im Spiilzyglade gratis druff.

(Los, Bebbi; gäll de wirdsch nit muff?)

Dr'Bäriswil, dä Gartezwärg,

maeht d Aggtioon pro Spalebärg

und startet fir die Hotelsenne e Minibärgprysvelorenne.

Au dr Guzzi macht uns Sorge

mit dr Aggtioon Bürgerzmoorge.

Es solle doeh die Freiluftsogge

in Zolli zue den Affe hogge.

Uss em leere Bau im Gellert äne

sehsch dr Felix Musfäld gähne,

und au dr Heini-Schmid vom Cron

baschtlet e Vermietaggtioon,:

nimmsch e Wohnig, duet si eh s lohne,

derfsch zwai Johr drin gratis wohne,

und dass es zem Vermiete längt,

griegsch grad die alte Vorhäng gschänggt,

wo derte, zem e Mieter fange,

sit Wuche an de Fänschter hange.

 

S Mövebigg, die Zircherbaiz,

het Aggtioon mit bsundrem Raiz,

fir zwai Stutz, bi Brot und Schingge.

kasch zäh Liter Kaffi dringge.

Sehsch, so gohts dr lieb lang Daag,

smacht jede Aggtioon wo mag.

 

Doch wie wärs, wenn mir, statt z'warte,

au mol eppis wurde starte?

In däm Aggtioonedurscht

wärs doch zletscht am Aend no wurscht,

wenn mir au no wurde schreie

und uns do dri wurde gneie.

Mir miechte aifach, jä, persé,

s glyche grad, wie d BVB.

Statt uff die rote Zahle z gnaisse,

die kurz in Farbekibel schmaisse,

und unser Basel, lachsch di doot,

het so dr ganz Daag Ooberot.

E ganz en anderi Idee,

war die gsi mit em FCB.

Dä kennt doch, s wär ganz gwiss kai Sind,

en Aggtioon fir s Sorgekind

im Sanggt Jakob unde starte,

fir dä wo z Bärn im Rosegarte

si Räschte Glitz im Drägg versänggt.

Nai, Karli, gäll, das hättsch nie dänggt?

Nai, Karli , gäll, das hättsch nie dänggt?

Jä, Basel het kai Karli meh,

drfir jetz halt drey Drummeli.

Drum dien mir hytt scho Batze biige

und lehn en Aggtiöönli stiige,

en Aggtioon pro Komitee.

Es duet uns nammlig schregglig weh,

z'gseh, wie die bleede Fritze sitze,

im leere Kiechli Wysswy schwitze,

und dert, verlosse vo dr Wält,

Albdraim hänn vo «Fäscht» und «Zält».

E jede Basler ka nur hoffe,

dä Draum sig dief im Wy versoffe,

denn die Bieridee isch z'gross

und Aggtioone hoffnigslos.

Mr kennte nur no Iysli glaage

und dr Frau Fasnacht adie sage.

 

Drum, Mysli, nimm s doch wiene Hohn!

Si drätte bal d in Aggtioon,

die Däg wo d nimm erwarte kasch,

dr «Morgestraich» und «Vorwärts marsch».