Fasnacht 15. – 17. Hornig 2015

Sujet:

Grille grille

Bekanntlig git s in unsrem Gsetz Reegle ad absurdum

Wo me kuum verstoot was gmaint isch, mänggmool isch es nur dumm.

D Verornig vo de Lääbensmittel isch e guet Exämpef:

Speetschtens syt em «B- B- B-ündnerfleisch» kennt die jo jede Tschumpel!

Dert isch alles gnauschtens greeglet, was mit Naarig z tue het.

Flaisch und Fisch und Fresch und Milch, Angge, Schmalz und Kuefett.

Hygiene, wääge und verschnyyde, kiehle, wirze, bagge,

Wärbig mache, Näärwärt, bschysse, färbe und verpagge.

Fir alles git s e Paragraph, s i sch nyt nit gnau erkläärt,

Was denn wie, wär, wo wurum am effektivschte näärt.

E Revision vo dr Verornig sell s no das Joor gää:

Me will jetz ney lnsekte in d Verornig yyne nää.

Mir sinn do z Weschteuropa disbeziiglig hindedryy.

Scho lengschtens kennte Gliiderfiesser uf em Spyysplan syy.

Nur wenn de saisch, jetzt kasch denn au bi uns lnsekte ässe!

Denn sage alli: «nit mit mir!» und «Pfui! das kasch vergässe!»

Drbyy wär s die vernimftigscht Leesig Protein ufznää.

lnsekte hänn fascht numme Vortail und e Huffe z gää.

D Produktion isch umwältschoonend, s git kai C02

Will Grille furze nit wie Rinder, und sin erseht no klai!

Au ethisch schyynt s verträttbar z syy. E Määlwurm het kai Gsicht!

Nit wie sone härzig Kälbli, wo s aim s Härz verbricht!

Drum tuet ys dä ney Trend au gfalle und mir styygen yy!

Schluss mit Burger, Plätzli , Fisch, vegan isch lengscht verbyy!

Wie kemme Schmätterling in Buuch? Hejo, dängg dur e Maage!

Drum simmer jetz mit Hut und Hoor yygflaischti Entomophage!

 

Mir tien ys an de Schaabe laabe

E Schabe fyylt sich wool im Maage

Dr Määlwurm griegt Paniermääl drum

Und macht im haisse Eel e Schwumm

Zikade sellsch im Aigääl baade

Salz und Pfäffer ka nit schaade

D Raupe hämmer gärn fritiert

D Summerveegeli längs halbiert

D Biene wird im Honig gaart

Und denn fir s Dessert ufbewaart

Termite mues me termisiere

Und si denn duur s Siib passiere

D Wanze brutzle uf em Ranze

Und tien im haisse Angge tanze

Us Lyys git s Mues, me schmiirt s uf s Brot

Und Fliege frisst me nit zur Noot

Motte sinn am beschte gsotte –

Nur Schwoobekäfter sinn verbotte.

 

Das alles teent ganz wunderbar, nur isch es halt – wär s glaubt!

Ooni toxikologischi Tescht gar nit erlaubt!

Wältwyt ässe iber zwei Milliarde Mensche rund

Dausig und dreihundert Kääfer! – trotzdämm sinn sy gsund.

Määlwurm, Grille, Haygumper! Mee darfsch do nit serviere.

Anders, wo so kreucht und fleucht, muesch z Asie konsumiere.

Au darfsch die Tierli nit vermiesle, oder Määl druss mache.

Me mues erkenne, was me isst! Grad das isch doch zum Lache!

So kenne sich lnsekte kuum als Asse etabliere,

Wenn s alle gruust und niemer wott so Haygumper probiere.

Mir wänn ys aber nit beklaage, s isch en erschte Schritt.

Wär waiss, villicht in zwanzig Joor, do mache alli mit.