Vor zimmlig gnau aihundert J00r – und das isch w00r!
Sin d Grindigsmamme zämme ko und hänn im Chor
Sich d Treyy gschwoore und e Grindigsbrief verfasst,
Wo dinne stoot, dass iine d Fasnacht nimmi passt
Und dass sii sofort wänn d Entwigglig vorwärts z tryybe.
Es goot ‹ne dorum, aggtiv d Gschicht um d Fasnacht z schryybe.
D Fasnacht hätt me dert scho miesse ney erfinde,
Strukturiere, ferdere und guet ergrinde.
Us em Hintergrund, beschaide, dasch s Rezäpt
Und au dr Grund wurum die Clique hitt no läbbt!
Drum leend eych gsait syy, es isch w00r,
D Mysli git s syt 100 J00r!

Syt 1910 sinn also d Mysli fescht am Wirgge,
Dra, dr Fasnacht hinterruggs dr Rugge z stergge.
S isch scho zimmlig eppis gange rund um d Mysli:
1912 striggt eini s erschten Amedysli!
Au am Drummeli hännn mir scho frie brilliert
Und dr Arabi mit drey Stimme intoniert!
Und wäärenddämm im erschte grosse Krieg die maischte
Nit wänn gässle sondern Aktivdienscht mien laischte,
Halte d Mysli tapfer d Stellig in de Gasse
Und begaischtere die kriegsgschädigte Masse.
Drum sin d froh, isch s wirgglig w00r
D Mysli git s syt 100 J00r!

Dr Generalstraikhämmer schaadloos iberwunde,
D Opfer vo dr Fasnachtscliqueweer verbunde,
Kämpft fiir d Konditione bi de Subväntione,
Greeglets Yebigsbsueche fiir d Kommilitone.
Im 33 hämmer fiir die grosse Buebe
Miesse fiir en Uffangbeggi ummeluege.
Kurzerhand hett me beschlosse fiir die Frinde
Dr Stammverein mit Junger Garde z grinde.
S Konzil vom Kiechli het denn in de Fuffzgerjoore
D Hohait iber d Passepartout an uns verloore.
So glaubet s doch, s isch sicher w00r!
D Mysli git s syt 100 J00r!

Nach em zweite Krieg sin s mirgsi, wo d Frau Fasnacht
Us de Sääli zrugg uf d Strooss brocht hänn. Das macht
Uns sò schnäll kaine nooch. Drzue hänn mir vo alle
Uf dr Stroos am luttschte pfiffe! S het ys gfalle!
Mr sin emol im Schottereggli defiliert
Und hänn drno dr Whisky Soda publiziert.
Ikebana hämmer dänggt, wär au no glatt:
Drum git s sythär Mimosein dr ganze Stadt!
Und denn sin d Achtesächzger ko und mir sin gsässe:
Bim SIT-IN am Cortège zum s Comité erprässe!
Jä gopferglemmi, s isch doch w00r!
D Mysli git s syt 100 J00r!

Zur glyyche Zyt het Hair uns zimpftig inspiriert
Und uns zu Baschtperrügge-freye Larve gfiert.
Afang Sibzger het dr Tingueleye Mysli gnoo
Und s fiir si Fasnachtsbrunne als Modäll lo stoo.
Am maischte stolz sin d Suffragette– kasch s begryffe?
Dass d Fraue ändlig derfe erschti Stimme pfyffe!
Im 72 sin mir s erscht Mol richtig
Dr ganzi Cortège gloffe; finde s aber wichtig,
Dass mr frooge: soll i oder soll i nit?
Nur, sythäär mache mir dä Saich brav all Joor mit!
Jä glaubsch es nit per se, s isch w00r!
D Mysli git s syt 100 J00r!

Ändi Achzger hämer d Muure zwische Frau
Und Maa lo falle, d Clique gmischt, dass jetzt au
D Männer d Freyheit hänn, mit Fraue Fasnacht z mache!
Erscht kirzlig hämmer miesse d Diskussion entfache,
Dass e Burka nyt als hinderet bim Pfyffe!
Mr warte druff, dass die Betroffene s begryffe.
Und jetzt macht s Comité uns d Subväntione stryttig:
Uns›re Namme syg z sexistisch, gar nit zyttig!
Jänu, das wärde d Mysli au no maischtere
Wytter kämpfe, s Fasnachtsvolgg begaischtere!
Bekanntlig sell me Feschtli fyyre, wenn si falle!
(Wenn si nit vo sälber falle, mues me bitzli schupfe)
Drum fyyre mir am Beschte jetzt das Fescht mit alle!
Jetzt glaubsch es ändlig, s isch doch w00r!
D Mysli git s syt 100 J00r!

Solang s do z Basel d Fasnacht git, laufe d Mysli z vorderscht.
Und will mr nonig gstorbe sin, pfyffe mr no vorerscht.