Lampe fille! – Fasnacht 11. – 13. Hornig 2008

Impressione

Zeedel

D Menschhait het jo immer s Gfyyl,
D Zytte wärde schlächter.
Friener isch es besser gsi
Und d Wält wird ungerächter!
Me vergisst, si Lääbe z gniesse,
Vor lutter Sorg und Kleene!
Und in zäh Joor isch «hitt» die Zyt,
Wo mir ys drnooch seene.

Eso aagluegt git s hitt efang
Allerhand z beklaage:
So isch d Jugend mittlerwyyle
Fascht nim zum vertraage!
Z fescht verweent, kaini Maniere
Laischtigsmiedi Maade!
Glangwyylt, wieschti Klaider aa,
Apathisch und – verlaade!

S isch ’ne nit zum Vorwurf z mache.
Die Junge hän s hitt schwäär!
Wäg Iberfluss, z vill Raiz und Chance
Sin si trääg und läär.
D Lääri mues doch uffgfillt wärde,
Sunscht isch s unerträäglig.
Alkohol isch Wääg und Zyyl
Und Unterhaltig – tääglig!

«Lampe fille!» haisst d Devise,
Uff ganz verschii›dni Arte:
Am Beschte scho dehaime afoo,
Und lieber nit no warte.
Uff em Wäg in d Stadt an d Party
Dringgt me sich scho drimmlig.
Dasch ginschtiger als in dr Bar.
Gedrängg die koschte zimmlig.

Meegligkaite git s no mee,
D Usswahl, die isch gross:
Me kennt an Barfi go zem Suffe,
Grad zmitz uf dr Stross!
Will dert wird s automatisch suuber,
Kasch d Fläsche grad lo syy.
D Stadt luegt guet zu ihrer Jugend,
Coop Pronto isch drby!

An e «Flat Rate Party» go!
Das wär doch au no eppis.
Aimol Yydritt zahle länggt,
Ab denn isch alles gratis.
S Kranggenauto stoot parat
Fir die, wo nimm verwache.
Drfiir isch s vorhär luschtig gsi.
Mit Alk, do ka me lache!

Dr Neyscht isch «Bring Your Own» grad mit
Denn kunnt dr Suff ganz billig!
D Buebe wärde muetiger
Und d Maitli alli willig.
S Lokal mues nur no Muusig spiile,
Nach dr Party ruume.
Au die, wo nit vill Sagggäld griege,
Hän am Schluss e Pfluume!

***

Wirgglig anderscht isch als friener,
Und villicht au schlächter:
S Suffe isch nim Rebellion,
Nim Uffstand gege d Wächter.
S isch Usswääg us dr Langewyyl,
E guete Grund zem Hänge,
Dr ainzig Wääg sich sälber z dulde,
Und d Lääri bitz z verdränge.

Was soll denn s Klaage, s het kai Wärt.
Machet doch kai Mais.
D Entwigglig lauft syt jehäär zyklisch,
D Menschhait lauft im Krais.
S blybt alles anderscht und wird glyych.
S wird besser und denn schlächter
Drum stoosset aa uff d Gegewart
Mit Alkohol und Glächter!


© Seibi-Mysli 2021