Super, Nänny! - oder: Nie me Mieh mit Erzieh! – Fasnacht 6. – 8. März 2006

Impressione

Zeedel

Image

Das Sujet soll e glunge Phänomen ergrinde:
Nämmlig, as me ka e Kinderfrau erfinde,
Wo am Färnseh tuet beschryybe, wie me s Lyyde
Mit so schlimme Kinder ka gezyylt vermyyde.
«Super Nanny» isch lutt Dixionäär e Frau,
Wo Kinder super guet erzieht und luegt, dass au
Dr greschti Schlingel folge ka und sich benimmt.
Si wird vo Elt’re engagiert, dass sii bestimmt
Wenn gässe, gschloofe, brinzlet wird. Si bhaltet d Rueh
In jedem Fall. E Kind ka no so schwiirig tue.

Image

Jetz frogt sich: wie isch s meeglig, dass dä Saich, dä saicht
So hochi Yschaltquoote und Erfolg erraicht.
Es git drfiir drey gueti Grind: Do isch drby
Die Faszination mit em Realitiy
TV, wo d Missligkait vo fremde Läbe bringt
Und s willig Publikum dehaim am Färnseh zwingt
Si aige Eländ an de and›re Schicksal z mässe,
S mit versteggter Schadefraid komplett z vergässe.
Das isch Voyeurismus pur; pervärserwys
E fyys und menschlig Grundbedirfniss – obermyys.

Image

Dr zweiti Grund lyt bi de Gsellschaftsumgangsforme
Oder besser gsait, bim Fääle vo de Norme,
S gmeinsam Referänzsystem. Drmit isch gmaint,
Dr Staat und d Kirche und d Moral, wo s Volgg veraint.
Dr Knigge isch nim aggtuell und s isch hit glyych
Ob s Kind im Tram dr Sitz verdräggt und unschyych
Gyxt, wenn s eppis wott; wenn s furzt und kätscht und gräblet
And›ri Kinder bloggt und kifft und sich benäblet.
D Elt›re traue sich nim Gränze z setze und z erzieh,
E Machtwort z spräche – will si halt nim wisse wie.

Image

Bi Kind und Schuel do mälde sich gärn d Pädagoge
Laider sin die nie realitätsbezoge!
Wohlfyylegge anstatt schaffe, spiilend lehre,
Laischtig stoot im Hintergrund und Note steere.
Däm stoht d Nänny gegeniiber, ganz pragmatisch:
Regle, Grundsätz, Stroofe – s isch scho fascht dramatisch
Wie die effiziant und kIar an d Arbet goot
Und jedem Gspyyrsch-Mi grad diräggt vor d Sunne stoot.
Si setzt uf Tradition und Drill und strängi Luune
D Kinder folge, d Elt›re kenne nur no stuune.

Image

Fir dä Erfolg git s no e wyteri Begrindig:
Dr Glaube, d Nänny syg e trendy Neyerfindig!
Drby git s Kindermaitli scho syt s Kinder git
Und jetz ganz pletzlig warde si zum Färnsehhit.
E Byspiil fir dä Drache findet me im Heidi:
D Frau Rottemeier isch e ganz e bsunders Leidi.
Ihri Strängi isch rächt ibertriibe hart
Und baidi Kinder wärde krank wäg ihrer Art.
D Methode, wo me dert als iberhoolt empfindet
Hän s Konzäpt vo «Super Nänny» glatt begrindet!

Image

Am Färnseh het me immer s Gfyyl, dass d Kinder schlimmer
Wärde. Aber das stimmt nit. Si sin doch immer
Scho genau die glyyche gsi. Nit unerziehbar,
Wie me hit tuet maine. O Schuld, die liggt ganz klar
Bi däne, wo si sotte forme und behiete.
D Nänny isch die letsehti, wo das no ka biete!
Super!


© Seibi-Mysli 2021