Dr Doggter Frey, my Frauenarzt,
dä maint zwar, dass es gweehnlig harzt,
wenn men e Kind will uff Termin –
und findet›s usserdäm e Spleen.
Aer scho – doch nit mir Seibi-Mysli,
mir geehn voll Fraid an d›Uffgoob aane:
d›Idee, s Millenium-Buschi z›blaane
bringt nämmlig alli uus em Hysli.

Dr Stichdaag isch dr 9.4. –
Wär will, dä git sich dorum Mieh,
und sait zum Schatz: «Kumm, y verliehr Dy,
s isch Stoosszyt bis am Morge frieh.»

Säggs nämme sich daatsächlig vor
Buschi z›griege uff die Zyt,
ier sin scho in de Wäggseljohr
und zwaine saage d›Männer nyt.
Dr Räschte findet›s zwar verruggt,
und drotzdäm wärde d›Duume druggt
fir d›Gaby, d›Corinne und d›Andrea,
fir›s Ursi, s Ruthli und fir d›Bea.

Fir d›Bea stooht vo Aafang fescht:
Jetzt jokai Stress, das wär fataal,
kai Fiebermässer, kaini Tescht,
y gib my logger und normaal.
S normaale Lääbe wyter fiehre
normaal sy und nit z›vyyl studiere,
und – ganz normaal – nimmt sy au d›Pille;
wo sy›s denn merggt, isch scho Aprille.

Au bi dr Corinne Rosemund
lauft›s Buschi-Mache nit so rund,
denn s Uusenääh vo dr Spyyrale
will d›Granggekasse schynt›s nit zaahle.
Im Heer Gemahl isch das grad rächt,
als Banker kennt er sy Revier;
Termingschäft laufe nämmlig schlächt –
und anstatt säggs sin›s nur no vier.

Bim Gaby spiilt s lieb Vatterland
an sällem Fryttig iibel mit,
dr Fredi griegt vom Kommandant
wääg «hööcherer Gwalt» sy Uusgang nit.
D›Regierig kunnt uff Truppebsuech
und s isch drum nyt mit Urlaubsgsuech;
so blybbt dr Markus in Wolhuuse
und darf nit haim zur Frau go pfuuse.

Bim Adrian funggt d›Firma dryy,
so Seminar, die mien halt syy.
Wenn 5 Gschäft rieft, kenne doch die maischte
s Nai-Saage sich hit nimme laischte.
Dr Personaalchef het bestumme
und s Wuchenänd gooht solo umme:
D›Ruth z›Basel, und är z›Wollishoofe –
so git›s bekanntlig kaini Goofe.

D›Andrea het›s nie aifach ghaa
mit em Raimondo, ihrem Maa.
Dä het›s nadyrlig schlächt verdrait,
wo si das mit em Buschi sait:
«Sunscht gooht›s der no!» maint är ganz muff,
«nur wäg dr Schnapszahl pfyff y druff».
Und statt mit syner Frau Verkeehr
git›s jetz grad z›laid e Pintekeehr.

Fimf hän sich also bees verrennt,
nur s Ursi haltet schliesslig Wort
und sai t zum Kurt: «Hit wird nit pennt,
mer machen ain uff Laischtigssport!»
Es klappt – und au an Summerstamm
bringt s Ursi guete Bricht:
«S lauft alles rund und nach Programm,
dr Bluetdrugg stimmt und au my Gwicht.»

Doch denn kunnt d›Mäss und bi mym Schatz
schällt s Handy uff em Petersplatz;
am anderen Aend isch s Anneröös
und ihri Stimm deent Iyycht nervöös:

S het Zwilling gääh bim Ursi Minder,
zwai gsundi Siibe-Monet-Kinder.
AIIi sin zwääg und grooss isch d›Fraid –
und wäg em Datum duet›s ne laid.»

Fazit:
So Sache leehn sich nit erzwinge
dr Arzt waiss druff e Liedli z›singe.