Mesdames, Messieurs, liebi Moodefrinde
uss Rom, Paris, uss Ammel hinde,
uss Londe, Wien – kurz alli Gescht,
mir begriesse eych zem Juubelfescht.

Vor fuffzig Johr, dr Grieg isch umme,
will d Dummhait doch no nit verstumme.
Denn wyt ewägg vom Haimedland
zinde d Ami im Inselsand
e Bombe, wo d Ateemli spaltet
und kuum e Seel am Lääbe bhaltet.

Doch fasziniert vo dam Spegdaggel –
d Natur het au no hit s Debaggel –
und beyydruggt vo dr Insle,
foot e Gaulois* afoo pinsle,
entwirft zwai Steffli um die Zoone,
wo vor de Männerbligg muesch schoone,
suecht sich denn e bombe(!) Stigg
mit Buuse, Buuch und Ängelsbligg
und paggt die Venus moodisch fyyn yy,
geboore wär s bekannt Bikini**.

* Louis Réard
** Atoll im Pazifik oder ebbe s zwaidailig Badklaid

D Männer juuble, dr Gaifer lauft,
aafänglig wird s zwor sälte kauft.
Die maischte Fraue zeegere,
so halbblutt umme z pleegere.
Doch d Hemmige wärde schnäll abgleggt,
dr Exibitionismus gweggt.
E verpaggde Buuch gsehsch drum fascht nimme,
und pletzlig lehre Männer schwimme,
wo vorhäär scho hänn Schiss bikoo,
mit aim Fuess in e Kneippbad z stoo.

An alle Stränd uff dääre Wält
gitt s Flaisch z bestuune ohni Gäld:
Z Italie an dr Adria
leege sii no Stoff dryy aa,
und d Papagalli gnädde d Hoose,
bis d Stuude stehn wie rooti Roose.
Z Rio an dr Copacabana
glaube d Männer sich im Nirvana,
wenn schoggibruuni, rundi Belle
uss em Bikini uuse quelle.
Iberem Marzili an dr Aare
feen d Nationalreet afoo schaare
und Iyychte wie Lampe voller Pfuus
bim Gnaisse ab em Bundeshuus.

Me gweent sich aber mit de Johr
an blutty Byych und gseht kai Gfohr,
dass d Volggsseel kennt ze Schaade koo
und mit dr Sitte dr Bach ab goo.
Doch als wie glainer wärde d Daili
und fyyny Bändeli anstatt Saili
heebe nur no d Steffi zämme.
D Kirche maint, me sott sich schämme.
Dr «Flower Power» Kinderchor
singt dernoo, «make love not war».
S Bikini stoht vor schwääre Zyte.
Dää Freigaischt schloot no alle Syte,
und eb Pfludde, diiri Bohne,
drait me nur noo oben ohne.
Gwissi gsehn bim blutte Buuse
nur dr Sex und s zämme pfuuse.
Wär «in» isch, gitt sich aber «cool»
bim Baade oder nääbem Pool
und drum isch s denn vo dääre Zyt
zer Geegestreemig au nimm wyt.

Hitte paggt me wiider yy
und lot so blutty Spiili syy.
S Bikini wird vo Sägg verdrängt,
dr Buuch und d Brischt in d Hille zwängt,
ganz im Gaischt vom Cristo Fieber
drait me yypaggt wiider lieber.
Zem Schluss als Maa my «coming out»:
soo Fääne hann mir d Luscht versaut.
Eb Faane oder au Bikini –
ych lees bim Kuoni morn my Schyyn yy
und hängg an d Fasnacht Ferie draa,
zwai Wuche blutt am FKK.