Als glaine Maa, das waiss e jeede,
(eb d'gscheyt bisch oder ganz e bleede)
wenn d'Gäld uusgisch, meh als de hesch,
denn gehn dr d'Gläubiger an d'Wesch.
Und s'schlimmschti isch an däre Chose:
Dy guete Ruef, dä hett's verbloose.
Drumm iberlege sich's die maischte,
eb si sich's wirgglig kenne laischte,
Schulde z'mache wie-n-e Dotsch
(will de jo ,nit in d'Kischte wottsch).

Und doch isch z'Bâle dr Plaitegaier
ganz digg und fätt, leggt vyl z'vyl Aier.
Es sinn so «Clübb», wo d'Kippi mache,
wo-n-är sich suecht zem Jungi mache:
Ains hett är ins «Plaza» gleggt
und d' Aggzionär ganz bees verschreggt.
Ains hett är gleggt in d'Oekk
und au verruggt vyl Fraid dra gha.
Em FCB und EHC
je au e-n-Ai, und s'git no meh.

Me kennt doo no vyl uffzelle –
und s'isch bi allne nimm vyl z'welle.
(s gitt nit nur sportlig Katastrophe),
d'Mänätscher kenne nimme schloofe
und d'Breesi gänn sich s'isch e Schand
d'Diire raihewys in d'Hand.
Me sait dass gueti Männer fähle,
drumm duet me allbott neyi wähle.
Die gsehsch denn stur und unverschrogge
d'Schulde nomoll uffestogge.

Wenn d'wurdsch brivat so Schulde mache,
haissti's gly, sygsch nit ganz bache ...

Fir z'wisse, dass das nit ka glabbe
bruchsch ganz gwiss kai Doggderkabbe.
Wenn d'aariehrsch mit dr z'grosse Kelle,
isch mit Brofyt halt nyt meh z'welle.
So stehn si bletzlig vor de Schäärbe;
denn sait ain schych: «Me kennt jo wäärbe!»
mit vyl Grach und Holdrio,
zem Byspiil ebbe grad esoo:
«Halb Basel schweert uff d'Oekk!»
(Wenn's wohr wär, wär sy besser dra!)
Oder: «Basel ohni FCB
wär mys firs Bebbi-Renommée!»

Dr Plaitegaier lacht in d'Fuscht
's nutzt alles nyt, 's koscht numme WUschT.
So wird e mängge usse hui,
und inne blybt är – aider – pfui.