Was me so alles dyschle ka,
Lääst me grad doo undedra.

Me ka Minze und Mainige dyschle,
Me ka Margge und Blaggedde dyschle,
Me ka Käfer und Schmitzli dyschle
Me ka Ringli oder Partner dyschle,
Mir hänn aber e SUPER-HIT,
Mir dyschle Bliemli die woos git.

Hahnefuess gegen Anemone,
Anggebliemli gege Sojabohne,
Fuchsia gege Herbstzytlose,
Lupine gege sydigi Mimose,
Wär dänggt doo nit ans liebkose.

Veyedli gege Rizinus,
Verstopfti hänn drvoo dr Gnuss,
Zimmerlinde gege Schachtelhalme,
Dahlie gege Dattelpalme,
Stinggblueme gege Flider,
Verlange d Lyt allewyl wider.

Brennessle gege Gummibaim,
Orchidee fir scheeni Feriedraim,
Aini mecht wyssi Rose us Athen,
Gitt drfir Dutzendi Kakteen,
Aine will ummsverregge,
Stachelbeeri fir sy Gartehegge.

Margrittli will Aini zem zupfe,
Drfir git si Unkruut zem rupfe,
Oder Dotterblueme gege Baldrian,
As me besser «pfuusen kaan».

«Männertreu» dyschle mr nit,
Will s sowiso soo wenig git.

Lueget uns aa – sinn mir nit au e scheeni «Bliemlipracht»,
me ka uns au dyschle, aber numme gege «d Keenigin der Nacht».