Vo Energy dien alli reede,
AIIi Gscheyte – alli Bleede,
Me froggt, woo kennt me au noo spare,
Nadyrlig zerscht bim Autofahre.

Me sott dehaim im Dunggle hogge,
Nit bade, in ungwäschne Sogge,
Zem Färnseh sott me au nit anestiere,
Me muess au noo ans Fudi friere.

Langsam bekunnt me schon e Gruuse,
Gedraut sich nit emool me z pfuuse,
Sogar unsri Expärte wärde hässig,
Bohre sie, denn kunnt statt Eel nur Essig.

Aber «d Schaiche» kenne bohre,
Ze dyre Bryse ganz unverfrore,
S Eel isch wichtig utt dr Wält,
Die läbe guet vo unsrem Gäld.

D Sunne git au Energy,
Das sehn sogar noo d Bärner y,
Drum bade si jetzt oben ohni,
Doch schnäller worde sinn si noni.

Energy het unsri Therese Nadig,
As Schykanone het si Ladig,
Si fahrt alles iber dr Huffe,
Si hauts sogar noo änen uffe.

Energy hänn unseri Schugger.
Si schnabbe – hoIs dr Gugger,
Uff em Märt nummen ai hohl Ai,
Wenn si Gligg hänn amm zwai.

Energy hänn unseri Bure,
Si lehn die alte Wegger sure,
Mer derfen aifach nit vergässe,
D Kieh wänn joo nit friener frässe.

Energy het unsere F.C.Be,
Das hämmer immer wider gseh,
Aber si wärde schnäller seggle miesse,
Suscht zelle d Gool, wo die andere schiesse.

Energy hänn au unseri Fraue,
Wenn si s in Ussverkauf dien haue,
Si luege maischtens ebbis aa,
Wo me gar nit bruuche kaa.

En alti Dante mit vyl Energy,
Das ka nur d Frau Fasnacht sy,
Si kunnt jedes Johr mit Schwung,
Dä erhaltet alli zämme jung.